کمیته امنیت ملی تاجیکستان اعلام کرده است که در جریان یک درگیری مسلحانه در منطقه مرزی ختلان، یک شهروند افغان کشته و سه تن دیگر موفق به فرار شده‌اند. این افراد در حال تلاش برای قاچاق مواد مخدر از افغانستان به خاک تاجیکستان بودند.
براساس گزارش اسپوتنیک تاجیکستان، نیروهای امنیتی و مرزبانان این کشور پس از شناسایی قاچاقچیان، برای متوقف ساختن آنان اقدام کردند، اما با مقاومت مسلحانه روبه‌رو شدند. در نتیجه این درگیری، یک فرد افغان کشته شد.
کمیته امنیت ملی تاجیکستان افزوده که در این عملیات بیش از ۷۲ کیلوگرم مواد مخدر، یک قبضه کلاشینکف و مقدار قابل توجهی مهمات به دست نیروهای امنیتی افتاده است. هم‌چنان تحقیقات در این زمینه ادامه دارد.
مقام‌های تاجیک هشدار داده‌اند که گروه‌های جرایم سازمان‌یافته در مناطق مرزی با افغانستان فعالیت گسترده‌ای در زمینه قاچاق مواد مخدر دارند.
بیشتر بخوانید:
- تیم‌های ملی فوتبال بزرگ‌سالان و نوجوانان افغانستان برابر سوریه و تاجیکستان شکست خوردند
- دبیرکل پیمان امنیت جمعی؛ تقویت امنیت تاجیکستان در برابر افغانستان اهمیت دارد
- تاکید رییس جمهور تاجیکستان برای توسعه دهلیز ترانزیتی در منطقه
