رییس کمیته اجرایی ساختار منطقه‌ای ضد دهشت‌افگنی سازمان همکاری شانگهای یا SCO هشدار داده است که هزاران نفر از اعضای گروه‌های اسلامگرا در امتداد سرحد افغانستان و تاجیکستان حضور دارند.
این هشدار پس از کنفرانس سیکا در نشست دیگری زیر عنوان « همکاری بین‌المللی و منطقه‌ای امنیت و مدیریت مرزها برای مقابله با تروریسم» بیان شده است.
این نشست پس از کنفرانس سیکا در آستانه، در شهر دوشنبه تاجیکستان برگزار شد و شرکت‌کنندگان در آن به تجمع اسلام‌گرایان در مرزهای تاجیکستان پرداختند.
اورسلا میرزایف، رییس کمیته اجرایی ساختار منطقه‌ای ضد دهشت‌افگنی سازمان همکاری شانگهای در این نشست بین‌المللی تاکید ورزید که دستکم ۱۳ هزار و ۵۰۰ نفر از اعضای گروه‌های اسلامگرا مرزهای تاجیکستان را تهدید کرده‌اند.
در این نشست، آقای میرزایف اذعان کرد که گروه‌های اسلام‌گرای یاد شده شامل داعش نمی‌شوند.
امامعلی رحمان، رییس جمهور تاجیکستان نیز گفته است که دستکم ۱۲ گروه دهشت‌افگن بین‌المللی در افغانستان فعال هستند و امنیت کشورهای عضو سازمان همکاری‌های شانگهای را تهدید می‌کنند.
پیش از این، رییس جمهور تاجیکستان تاکید ورزیده بود که دستکم ده هزار انتحاری و مجاهد در حال آموزش در مناطق سرحدی افغانستان و تاجیکستان هستند و قصد دارند تا وارد آسیای میانه شوند.
بیشتر بخوانید:
- تصمیم اعضای سازمان همکاری‌های شانگهای بر لزوم تهیه فهرست واحد دهشت‌افگنی
- بی توجهی سازمان شانگهای به طالبان؛ نماینده‌ای از وزارت خارجه طالبان دعوت نشد
- روسیه نسبت به روزهای پس از خروج ناتو از افغانستان هشدار می‌دهد
- درخواست طالبان برای انعکاس پیشرفت‌های افغانستان به جهان
