وزیر داخله تاجیکستان در تازه‌ترین اظهارات خود گفته، طالبان برای سه هزار دهشت‌افگن پاسپورت افغانستان را صادر کرده است.
رمضان رحیم‌زاده این اظهارات را در کنفرانس همکاری‌های بین‌المللی و منطقه‌ای برای مبارزه با دهشت‌افگنی در دوشنبه، پایتخت تاجیکستان بیان کرده است.
آقای رحیم‌زاده تاکید ورزید که این وضعیت بار دیگر نشان داده است که خطر رژیم طالبان تا چه حد در افغانستان جدی می‌تواند باشد.
وی در ادامه خطاب به شرکت‌کنندگان در این کنفرانس اذعان کرد که چالش‌های افغانستان باید در کانون توجه همه کشورها باشد.
کنفرانس همکاری‌های بین‌المللی و منطقه‌ای برای مبارزه با دهشت‌افگنی از روز گذشته و به مدت دو روز در دوشنبه، پایتخت تاجیکستان برگزار شده و نتیجه همکاری مشترک سازمان امنیت و همکاری اروپا، تاجیکستان، دفتر مبارزه با دهشت‌افگنی سازمان ملل، اتحادیه اروپا، عربستان و قطر است.
در روز اول کنفرانس نیز، امامعلی رحمان، رییس جمهور تاجیکستان هشدار داده بود که ده‌ها هزار مجاهد و انتحاری در حال گذراندن دوره آموزشی خود در افغانستان هستند و قصد دارند که وارد آسیای میانه شوند.
گفتنی است، طالبان تاکنون رسما به این اظهارات واکنشی نشان نداده، اما این گروه با همکاری حامیان خود، کارزاری را در توییتر به راه انداخته و در حال تبلیغ حملات انتحاری به عنوان افتخار خود است.
بیشتر بخوانید:
- تاکید تاجیکستان بر لزوم ایجاد کمربند امنیتی اطراف افغانستان
- تاجیکستان بر لزوم مبارزه با هراس‌افگنی در افغانستان تاکید کرد
- تاجیکستان می‌گوید، طالبان کنترل افغانستان را از دست داده است
- حمایت تمام قد تاجیکستان از تاجیک‌تباران افغانستان
